«Сайрам-Өгем» ұлттық паркіне қарасты аумағы 2 гектарды құрайтын жерді кәсіпкер Қайыржан Әбдіразақұлы жалға алып, туризм кластерін дамыту мақсатында  жазда рекреациялық сауықтыру орталығын ашқан. Төлеби ауданы, Қасқасу ауылынан 17 шақырымдай жерде орналасқан Сарыайғыр  шатқалында орын тепкен демалыс аймағы нағыз жұмақ мекен дерсің. Мұнда жетудің өзі экстрим. Біресе көкке өрлеп, ылдилап төмен құлаған тауға тән экстремальды әрі серпантин жолдың бұралаңы көп. Төменге қарасаңыз, етекте бастауын түрлі бұлақтардан алатын өзен мөлдір күйінде буырқана ағып жатыр. Шатқал қойнауына сұғына  енген сайын тамаша табиғат көрінісіне куә боласыз.  Ар жағында жабайы аңдарды да ұшыратуға болады екен. Қорықшылардың айтуынша, тау жотасында тау ешкілерді,  қасқыр, түлкі қарсақ сияқты жыртқыш аңдар жортып жүреді. Тіпті қоңыр аюды да көргендер бар. Анда-санда дүрбі шалғандар аң-құстарды ұшырата алады. Парк қызметкерлері фото тұзақ құрып, қар барысының тыныс-тіршілігін бақылауға алғанына бірнеше жылдың жүзі болыпты. Саф таза ауаны жұтқан сайын тынысың ашылып, көкірек сарайың  тазара түскендей әсер қалдырады. Мұнда күйкі тірлікті бір сәтке ұмытып, меңіреу әлемнің құшағына енгендей боласың.

Орталықта 6 нысан бар: оның біреуі меймандарды күтетін үлкен бөлмесі мен моншасы бар әкімшілік ғимарат. Ал төртеуі тынығушыларға арналған қонақ үй. Аржағында қарау алаңы қызмет көрсетеді. Киіз үй және бірнеше тапшандар қойылған.

Тау құшағында жатқан демалыс орны келушілерді қысы, жазы қабылдай алады. Себебі жылдың төрт мезгілінде де мұнда тамашалайтын нәрсе көп.