Туризмді жетелейтін маңызды фактордың бірі – жарнама, насихат жұмыстары. Әлемнің көптеген елдері тұралап қалған туризмін дәл осы тартымды жарнама арқылы тірілтіп алғаны жасырын емес. Ақпараттық технология, әлеуметтік желілердің дамыған заманы туризмді дамытуға таптырмас мүмкіндік. Бүгінде аудан басшығы бұл мүмкіндікті қолдан жібермеуге тырысуда. Жақында өткен жөні бөлек іс-шара осының айғағы.
Облыстық туризм басқармасының ұйымдастыруымен ауданда «Сайрам-су» марафоны өтті. Іс-шара Сайрам-су өзенінің жағасынан басталды. Марафонның мақсаты – салауатты өмір салтын насихаттау, жастарды спортқа баулу, патриоттық тәрбиені нығайту, сондай-ақ, өңірдің туристік және табиғи әлеуетін таныту.
Жарысқа облыс тұрғындарымен қатар еліміздің әр өңірінен келген 300-ге жуық спортшы мен әуесқой жүгіруші қатысты. “Sairam su trail” марафонының қашықтығы 6 000 және 12 000 метрді құрады.
Қатысушылар мәреге дейінгі жолды еңсеру үшін бар күш жігерін салды. Жүгіру бағыты Сайрам судың тау бөктері мен орман алқабын бойлай өтіп, спортшыларға ерекше серпін берді. Қатысушылардың арасында тәжірибелі желаяқтар да, сондай-ақ, мұндай жарысқа алғаш рет қатысып отырған әуесқойлар да бар.
«Бұл марафонға қатысушылар ерекше белсенділіп танытқанын айта кетейік. Қатысушылар саны өте көп. 300-ден асып жығылады. Марафонды дәл осы тау бөктерінде өткізуіміздің басты себебі – адамдарға біздің өңірде осындай керемет демалыс аймақтары бар екенін көрсету, таныту, жалпы айтқанда экотуризмді дамыту болып табылады. Бұл жарысқа тек Шымкент қаласы мен Түркістан облысының тұрғындары ғана емес Алматы, Астана секілді өзге қалалалардан да қонақтар келіп қатысты. Алдағы уақытта осындай марафонды өзге аудандардағы туристік аймақтарында өткізуді жоспарлап отырмыз»,- дейді «Open Turkistan» туристік-ақпараттық орталығы ЖШС директоры Ердәулет Пазылбеков.
Қатысушыларға ыстық тағам, ауызсу және көлікпен сүйемелдеу ұйымдастырылды. Іс-шара барысында қауіпсіздік талаптары толық сақталды. Сонымен қатар, марафон қатысушыларын тасымалдау үшін ұйымдастырушылар тарапынан 2 автобус көлігі қарастырылды.
Жарыс қорытындысы бойынша 36 жүлделі орын иегері анықталды. Жеңімпаздар мен жүлдегерлер қаржылай сыйлықпен, дипломмен, медальмен, ынталандыру сыйлақтары және сертификаттармен марапатталды.
Тұмса табиғатты тамсана жүргірген Дулат Серікбаев бұған дейін бірнеше жарысқа қатысқанымен, бұл доданың жөні бөлек болғанын айтады. Ол сайыста мәре сызығын екінші болып кесіп өтті. «Жүгірумен айналысып жүргеніме 7 жыл болды. Бұған дейін бірнеше жарысты көріп жүрген болсам мен үшін Сайрам судағы марафонның орны бөлек болды. Мұндағы таудың таза ауасы, жап-жасыл өсімдіктері мен қар басқан таулары адамға ерекше күш-қуат береді екен»,- дейді ол.
Марафон қорытындысы бойынша 1-орын жеңімпаздарына 70 мың теңге қаржылай ақша табысталды. 2 орын - 50 мың теңгеден жеңіп алса, 3 орынды үш қатысушы 30 мың теңгені қанағат тұтты.
Бұдан өзге, қатысушыларға ынталандыру ретінде «Kazakhasia», Спа «Rixos», Спа «Ramada by Wyndham Turkistan», «Ramada by Wyndham Turkistan» қонақүйлеріне және «Top Tobe», «Grand Eurasia», «Tandyr» , «Wow plov» ресторандарында арнайы тамақтану сыйлықтары табыс етілді.
Марафонның соңы концерттік қойылымдардан тұратын мәдени бағдарламаға ұласты. Облыстық туризм басқармасы алдағы уақытта бұқаралық спортты дамыту және Түркістан облысының туристік әлеуетін арттыру мақсатында осындай іс-шараларды өткізуді жалғастыруды жоспарлап отыр.
