Демалушыларға  қызмет көрсету сапасы жоғары болған сайын туризм өсіп-өркендемек. Бұл бағытта Төлеби ауданында тиісті жұмыстар атқарылуда. Туристердің сүйікті орнына айналған «Сайрам-Өгем»  мемлекеттік ұлттық паркі мен «Ақсу каньонында» енді серуендеу қауіпсіз әрі жайлы болмақ. Мамандардың айтауынша алдағы уақытта мұнда Дүниежүзілік банкінің PROGREEN жобасы аясында гранттық қаржы есебінен визит орталықтарын салу жоспарлған. Себебі бұл аймақтарға келушілердің саны жыл санап артып келеді. Ал әрбір келген туристің уақытын тиімді әрі қауіпсіз өткізуі – басты назарда. Әр жобаның құны шамамен 150 миллион теңге болмақ. 

Визит орталықтары келген қонақтардың маршруттарын айқындап беріп,  қауіпсіздік жағынан да толыққанды ақпарат береді. Өкінішке қарай, аталған аймақтар таулы өлке болғандықтан туристердің жоғалып кету, қауіпті жағдайда қалып кету, адасу секілді оқыс оқиғалар орын алып жатады. Міне, визит орталығы  осындай келеңсіз жағдайлардың алдын алуға септігін тигізетін болады. Орталық мамандары тек «құтқару» жұмыстарын ғана атқармайды. Олар келушілерге осындағы тау-тастың, жота мен шатқалдардың, сол аймақтың өсімдіктер және жануарлар әлемімен толық таныстыратын болады. Яғни, визит орталықтары танымдық, ақпараттық жұмыстарын жүргізіп, туристерді тарту, қызықтыру, жарнамалау қызметтерін де атқаратын болады. Айталық, турист «Сайрам-Өгем» паркіне келмей тұрып ол туралы толық ақпаратпен танысып, жүрер маршруты мен уақытын...барлығын алдын-ала есептеп, біліп келуге мүмкіндігі болады.   Визит орталықтарының тағы бір міндеті – бүгінгі күннің өзекті мәселесіне айналған демалыс орындарының  санитарлық тазалық жұмыстарына да жауапты болады. Әрі орталықтың ашылуы сол маңайда глэмпинг, ресторан секілді қонақтарға қызмет көрсету нысандарының көптеп ашылуына жол салатын болады.  Бір өзі бірнеше міндетті арқалайтын орталық – өңірдің туризмін алға сүйрейтіні анық