Өткен аптада Шымкент қаласындағы Арбат демалыс аймағында «Заң және тәртіп» тұжырымдамасын іске асыру аясында дәстүрлі «Халық заңгері» республикалық акциясы ұйымдастырылды. Ашық алаңда өткен іс-шара тұрғындарға тегін құқықтық көмек көрсетіп, олардың құқықтық сауаттылығын арттыруға бағытталды.

Акцияда азаматтардың заң көмегіне қолжетімділігін қамтамасыз ету, құқықтық мәдениетті қалыптастыру және тұрғындардың күнделікті өмірде кездесетін өзекті мәселелерін заң аясында шешуге қолдау көрсету басты мақсат болды. Бұл бастама халық пен құқықтық институттар арасындағы байланысты нығайтып, азаматтардың құқықтық қорғалу деңгейін арттыруға ықпал етеді.

Іс-шара барысында тұрғындарға заңгерлер, адвокаттар, нотариустар, жеке сот орындаушылары, мемлекеттік органдар мен құқық қорғау саласының өкілдері кеңес берді. Мамандар азаматтардың сұрақтарына жауап беріп қана қоймай, әрбір мәселенің заңдық тұрғыдан шешілу жолдарын түсіндірді.

Қабылдауға келген азаматтар негізінен тұрғын үй қатынастары, жер мәселелері, әлеуметтік төлемдер, еңбек даулары, алимент өндіру, банк несиелері мен мұрагерлік құқыққа қатысты сауалдарын жолдады. Әрбір өтініш жеке қаралып, тұрғындарға қажетті құқықтық түсіндірмелер мен ұсыныстар берілді.

Мысалы бір тұрғын мұрагерлік құқық туралы сауал қойды. Оған заңгерлер барынша түсінікті тілде жауап берді. Заңгерлердің айтуынша, еліміздің заңнамасына сәйкес мұрагерлік екі жолмен жүзеге асырылады: заң бойынша және өсиет бойынша. Өсиет бойынша мұра қалдырушы өз мүлкін кімге және қандай көлемде қалдыратынын алдын ала белгілей алады. Ал өсиет болмаған жағдайда мұра заңда көрсетілген кезектілік бойынша жақын туыстарына беріледі. Мұрагерлік құқық азаматтардың меншік құқығын қорғауда ерекше рөл атқарады. Ол қайтыс болған адамның мүлкінің заңды иелеріне өтуін қамтамасыз етіп қана қоймай, мұрагерлер арасында туындауы мүмкін даулардың алдын алуға көмектеседі. Сонымен қатар бұл құқықтық институт отбасы мүшелерінің әлеуметтік қорғалуына да ықпал етеді. Қазіргі таңда мұрагерлікке байланысты мәселелердің қатарында тұрғын үй, жер телімдері, банктегі жинақтар және өзге де мүліктерді рәсімдеу жиі кездеседі. Мұрагерлік құқық – азаматтардың заңды мүдделерін қорғайтын және мүліктік қатынастардың сабақтастығын қамтамасыз ететін маңызды құқықтық институт. Оның талаптарын білу құқықтық сауаттылықты арттырып қана қоймай, түрлі даулы жағдайлардың алдын алуға мүмкіндік береді.

Арбат алаңында ашық форматта өткен акция халық тарапынан үлкен қызығушылық тудырды. Мамандардың айтуынша, мұндай кездесулер тұрғындардың құқықтық сауатын арттырып қана қоймай, көптеген мәселенің сотқа дейінгі тәртіппен шешілуіне мүмкіндік береді.

«Халық заңгері» акциясы еліміздің барлық өңірінде тұрақты түрде өткізіліп келеді. Жоба аясында мыңдаған азамат тегін құқықтық көмек алып, өздерін толғандырған мәселелер бойынша білікті мамандардың кеңесіне жүгінуде.

Құқықтық мемлекет құру жолында мұндай бастамалардың маңызы ерекше. Өйткені заңды білу – әр азаматтың өз құқығын қорғауының және қоғамдағы әділеттілік пен тәртіптің нығаюының басты кепілі.