Ішкі істер министрлігінің  іс-шаралар жоспарына сәйкес, жуырда Шымкент қаласы  аумағында полиция департаменті тарапынан «Түнгі қаладағы балалар» жедел профилактикалық іс-шарасы өткізілді. 

Профилактиканы өткізудің негізгі мақсаты – жасөспірімдер қылмысының алдын алу және профилактикасы, соның ішінде кәмелетке толмағандар тарапынан кешкі және түнгі уақытта жасалатын құқық бұзушылықтардың жолын кесу, олардың құқықтарын қорғау саласындағы әкімшілік құқық бұзушылықтарды анықтау, құқықтық сауаттылықты арттыру, сондай-ақ балаларға қатысты қылмыстық қол сұғушылықтың алдын алу болып табылады.

Аталған рейдтік тексерулер аясында, қадағалаусыз жүретін, түнгі уақытта заңды өкілдерінің еріп жүруінсіз ойын-сауық орындарында және тұрғын үйден тыс жерлерде болатын жасөспірімдерді анықтау бойынша арнайы жұмыстар қолға алынды. Профилактикалық шараға жергілікті атқарушы органдар, прокуратура, білім, спорт, денсаулық сақтау басқармалары, жастар ресурстық орталығы, қоғамдық көмекшілер, үкіметтік емес ұйым және бұқаралық ақпарат құралдарының өкілдері қатысуда.  

Бір күндік рейд нәтижесі бойынша, ата-анасының қадағалауынсыз жүрген 12 жасөспірім Кәмелетке толмағандарды бейімдеу орталығына орналастырылды. Құқық бұзушылыққа бейім 10 жасөспірім және кәмелетке толмаған балаларын тәрбиелеу жөніндегі міндеттеріне немқұрайды қарайтын 4 отбасы анықталып, ішкі істер органының есебіне қойылды. Кәмелетке толмағандардың құқықтарын қорғау саласы бойынша 154 әкімшілік құқық бұзушылық анықталды. Соның ішінде, түнгі сағат 22:00-ден кейін заңды өкілінің еріп жүруінсіз ойын-сауық орындарында болған 16 жасөспірім және түнгі сағат 23:00-ден кейін заңды өкілінің еріп жүруінсіз тұрғын үйден тыс жерлерде болған 138 жасөспірім полиция көзіне түсті. Бұл бағыттағы жұмыстар әрі қарай да  жалғасын табатын болады деді құқық қорғау органының өкілдері.